Aborsiyonista gipasikop sa 15-anyos niyang anak

Giunay sa pagpadakop sa kinse anyos nga dalagita ang iyang kaugalingong inahan human mibati og kaluoy sa iyang manghod nga bag-uhay pa gidudahang gipa-abort samtang iya kining gilubong sa ilang tugkaran niadtong milabay'ng Martes sa gabii diha sa Sitio Bonbon Barangay Ocana lungsod sa Carcar.

Ang inahan sa bata nga nag-bleeding ug gikinahanglang madala sa tambalanan mao si Rosita dela Conception, hingkod ang panuigon, biyuda, maoy giingong misugo kang Francisca Diola,55, molupyo usab sa maong lugar ug inilang manghihilot sa ilang dapit.

Sigun pa ni PO1 Ruby Mulo ang miimbestigar sa kaso nga ang anak ni Conception uban sa iyaan niini midangop sa ilang buhatan ug misumbong sa panagkunsabo sa mga suspek pagtaktak sa gisabak nga bata.

Gikatahong ang mismong mitug-an ang gisugo sa paglubong sa puya nga hapit na makumpleto ang parte sa kalawasan apan sa kaluoy iyang gitug-an ngadto sa iyang uyoan kinsa gikatahong maoy mikuha sa puya ug gibutang kini sa ice bucket.

Pag-abot sa grupo nila ni SPO1 Meliton Agadier, PO2 Christopher Mendaros ug PO1 Ruby Mulo naabtan pa nilang nagkyugpos ug nagkadugo si Francisca hinungdan nga gidali nila kini og dala sa Carcar District Hospital samtang gisikop dayon si Diola.

Nakuha usab gikan sa lawak mao ang upat ka sudlanan sa tambal nga maoy gamiton sa pagpataktak og batang gisabak.

Sigun pa ni Mulo si Conception ug Diola mao gyuy ilang pasakaan og kaso sanglit nagkasabot man silang duha nga himuon ang krimen.