P1.2 M danyos, sa sunog sa Villagonzalo, Tejero

Walo ka balay ug duha ka balay patigayon naugdaw nga dunay danyos og P1.2 milyones sa pag-ulbo sa sunog diha sa Sitio Villagonzalo Uno sa eskina sa dalan M.J.Cuenco Barangay Tejero ning dakbayan kagahapno sa kadlawon.

Naalarma ang kabomberuhan alas 3:39 sa kadlawon human dunay mitawag nga concerned citizen diha sa ilang buhatan, daling giisa ngadto sa general alarm ang maong sunog human masutang nagsikit ra ang kabalayan.

Si SFO3 Allen Arciaga ang Chief Investigator sa Cebu City Fire Department mitug-an sa Banat News nga naapil sa maong sunog mao ang Tri-Ace Autmotive Center nga gipanag-iya ni Tony Chua ug nagbaligyag mga brake bonding ug ubang mga piyesa sa sakyanan lakip usab sa nasunog ang usa ka gamayng lumber yard sa maong lugar.

Sa imbestigasyon sa mga bombero giingong nagsugod ang sunog diha sa tindahan ni Chua apan wala pa matino kun unsay nakaingon niini, gikan didto daling mikatap ang kalayo sa mga kabalayan.

Sigun pa ni Arciaga giisa dayon sa general alarm ang maong sunog gumikan kay dunay gasolinahan diha sa atbang sa gikahitaboan 20 ka metros lang ang gilay-on.

Wala hinuoy nasakita sa insidente sanglit ang kalayo nakontrolar sulod lang sa 20 ka minutos.