Coal plant way peligro

Kumbinsido karon si Kongresista Eduardo Gullas nga walay peligro ngadto sa panglawas sa mga molupyo sa lungsod sa Naga kun mag-operate na ang planta sa Korean Electric Philippines Corporations.

Kini human si Gullas nakigkita sa briefing sa mga representante sa KEPCO ug mga eksperto diha sa iyang distrito nga si Jess Alcordo ug sa kanhi presidente sa Napocor ug karon kalihim na sa Department of Energy nga si Raphael Lotilla.

Matud pa ni Gullas mas gihatagan niya og gibug-aton ang kahimtang sa panglawas sa mga residente gumikan sa mga nadunggang impormasyon nga mopagawas og sulfur ang mga makina nga migamit og coal. Apan gumikan sa maong tigum nahatagan siya og lawom nga impormasyon kalabot niini.

Tulo ka mga importanteng impormasyon nga nakuha ni Gullas nga maoy nakapakumbinsir kaniya mao nga nakasiguro ang mga residente nga ang bag-ong teknolohiyang gigamit sa KEPCO dunay gas pulverizer nga makamenus sa sulfur emission.

Dunay electrostatic precipitation nga kahimanan ang planta nga magpugong sa abog nga makagawas sa kahanginan, katubigan ug dagat nga maoy gikahadlukan kaniadto nga unang maigo sa polusyon.

Labaw sa tanan ang World Bank nga maoy nagdiktar karon sa mga pundo sa kadaghanang proyekto sa mga nasud nga higpit kaayo og patakaran sa natad sa kinaiyahan mipapasar KEPCO matud pa ni Gullas base usab sa gibutyag kaniya nila ni Lotilla ug Alcordo .

Napanglantawan usab ni Gullas nga dako og ikatabang sa panginahanglan sa enerhiya ang duha ka planta gumikan sa kagamay sa reserba sa mga power producers ug ingon man ang mahatag nga buhis ngadto sa lungsod sa Naga nga naglaraw na karong himuong usa ka siyudad.

"We know that the brownouts are happening. I found out the supply nad demand of electricity here is very precarious.We have very small reserve and once there is a little hitch, brownouts will suddenly occur.And this has to continue because we have very little reserve. BY 2008, when this is operational, our demand is also big because of the incoming phase 2 of the MEPZ plus the North Reclamation Area and South Reclamation Area," asoy pa ni Gullas.

Midugang si Gullas nga , gitawgan na niya si Secretary Mike Defensor sa Department of Environment and Natural Resources nga kun maabot na ang Environmental Assessment study diha sa buhatan niini atimanon kini dayon ug hatagan ang KEPCO-SALCON sa ilang Environmental Compliance Certificate.