Ang napusilan ug naa karon sa tambalanan giilang si Edgardo de Luna alyas Gildo, 32, ulitawo ug mag-uuma sa maong lugar kinsa dunay giingong duha ka warrant of arrest sa kasong frustrated murder ug pagpangawat gikan sa RTC branch 26 ni Judge Maximo Perez ug MTC Judge Vidal Gilia.
Si PO1 Clyde Benjamin Yu sa pakighinabi sa Banat News nagkanayon nga niadto pang gabii sa Huwebes nila gialirungan ang balay nga gipuy-an ni De Luna apan gumikan sa kangitngit gipaabot nila ang kabuntagon una pa nila kini unta sikopon.
Apan gikatahong pagkabuntag dihang dakpon na si De Luna misukol hinuon og pinusilay si De Luna uban sa wala mailhing kauban niini ngadto sa mga polis.
Matud pa ni Yu ang kauban ni De Luna kinsa nakaikyas niadtong higayuna duna say nagpaabot nga warrant apan wala niya ibutyag kung si kinsa ang maong tawo sanglit dakponon pa usab kini.
Si De Luna nakaangkon og duha ka samad pinusilan diha sa iyang tuong abaga ug wala nga bitiis ug daling gidala sa Vicente Sotto Memorial Medical Center.
Nakakuha ang duha ka team sa RMG og usa ka kalibre 38 paltik rebolber nga may tulo ka basiyo ug usa ka buhing bala diha sa sulod sa tambor niini ug usa usab ka basiyo sa bala sa shotgun.