P1.5M alkanse sa mga kable gikawat

Kapin sa P1.5 milyones ang alkanse sa mga telecommunication company sa mga nahitabong pagpangawat sa mga kable niini nga gipang-estalar sa daplin sa kadalanan gikan niadtong milabayng buwan sa Enero hangtud sa Hunyo niining tuiga.

Gipadayag kini sa hepe sa Security Service Group sa Philippine Long Distance Company Elpedio Jun Tariman atol sa pagpadayun sa ilang kampanya karung tuiga sa Bantay Linya program sa PLDT nga gipahigayon sa Barangay Hall sa Hipodromo kagahapon sa buntag.

Ang maong kalihukan gitambungan gyud mismo sa tanang mga tanod sa maong barangay ug mga sakop sa Barangay Intelligence Network kon (BIN) nga giawhag sa maong kompaniya nga moabag sa gilusad niini nga kampanya.

Nunot niini, nang-apod apod sab og mga posas ingon man mga flashlight ug mga raincoat ang maong buhatan ngadto sa mga tanod ug BIN nga gitumong aron ilang magamit sa ilang kampanya pagpatuman sa kahusay ug kalinaw dinhi sa dakbayan.

Nakig-alayon ang management sa PLDT sa mga opisyal sa barangay Hipodromo ngadto gyud mismo kang barangay Konsehal Ruben Pasa nga maoy tsirman sa Committee on Peace and Order aron mapahigayun ang maong tigum.

Mipasalig ang maong kompaniya nga mohatag og ganti nga tag P2 mil pesos sa matag suspek nga madakpan sa akto nga mangawat og kable. - Darrel Carumba