8-anyos nalatayan

Usa ka 8 anyos nga batang kinamaguwangan sa unom ka magsuon nalatayan sa duha ka ligid sa usa ka pribadong sakyanan nga gimaneho sa usa ka arkitekto diha sa dalan Sabellano Barangay Quiot ning dakbayan niadtong milabayng gabii.

Patay nga midangat sa tambalanan ang biktimang si Wilson Ramirez,8, molupyo sa maong lugar human kini madasmagi sa Toyota Revo nga may plakang GJL-999 nga gimaneho ni Aurelio Quebranza, 39, minyo ug molupyo sa Sitio Mountain View sa naasoyng barangay.

Mitug-an si SPO3 Eugene Raganas sa Banat News nga kasamtangang nagdagan ang sakyanan sa suspek kinsa padulong unta sa Pardo Proper dihang kalit nga milabang ang biktima sa dalan.

Wala na makalikay ang suspek maong nagpunggit ang lawas ni Ramirez sa walang dulong sa Revo ug napasok sa ilawom dayong nalatayan ang lawas niini sa duha ka ligid sa walang bahin sa sakyanan.

Dali untang gitabang sa suspek ang bata ngadto sa tambalanan apan gideklarar nga patay na kini, mitahan hinuon ang suspek sa Traffic Group sa Cebu City Police Office ug gikatakdang pasakaan og kaso.