Salud gituboy para Comelec commissioner

Miretirong direktor sa Comelec -7 nga si Atty. Salud Aliganga gituboy ngadto kang Presidente Gloria Arroyo sa iyang kanhi mga sakop nga election officers aron siya himuong comelec commissioner sa maong buhatan.

Si Atty. Aliganga sa usa ka interbyu sa lokal nga sibyaanan mihangop sa gipakitang dakong pagsalig gikan sa iyang mga sakop ug mipadayag usab nga dili niya kini mabalibaran kun mahitabo man galing.

"It's a great honor in my part which means nga dako kaayo sila og trust and confidence nako, dako sila'g salig sa akong integrity sa trabaho," asoy pa ni Aliganga kinsa 40 ka tuig nga nagserbisyo sa Comelec.

"If I am fit to be one, why not," dugang pa niini dihang gipangutana kalabot sa petisyon sa 100 ka mga city ug town comelec officers ngadto kang Arroyo nga ipapili siyang commissioner sa comelec.

Gawas sa pagka-komisyoner gitinguha usab sa mga election officers nga himuon siyang regional consultant sa ilang buhatan sanglit sa pagkakaron wala pay hulip nga gitudlo ang Comelec.

Si Aliganga mipasabot nga naguol siya sa iyang pagbiya sa maong buhatan gumikan kay atol kini nga nabulit og mga pagsaway, pagduda ang 40 ka tuig nga buhatan nga iyang giserbsiyuhan ug wala pa kini makit-I og solusyon.