'Local Boys' miigo sa LBP

Dako ang pagtuo sa kapolisan nga mga "Local Boys" ang responsable sa pagtulis sa Land Bank of the Philippines sa lungsod sa Bogo apan wala isalikway sa kapolisan ang posibilidad nga grupo usab sa mga nasigpatang mga "ex-military" nga nanganhi sa Sugbo ang misakiyo sa P9.4 milyones.

Si Sr.Insp. Lemuel Obon ang hepe sa Provincial Police Investigation and Intelligence Branch (PIIB) sa pakighinabi sa Banat News miangkon nga naglisod pa sila sa pag-identify sa kung unsang grupoha ang miigo sa LBP-Bogo ug kasamtangan pa nilang gisugdan ang pagtigum og ebidensya ug mga pamahayag aron maporma na ang ilang lead sa kaso.

Sigun pa ni Obon mas dako ang posibilidad nga "local boys" ang mihimo sa pagpanulis diin nakakuha gyud og P9.4 milyones nga salapi ang gibana-banang 7 ngadto sa 10 ka tulisan nga nagluwan sa sakyanan niadtong gabii sa adlaw'ng Lunes.

Midugang si Obon nga sa pagkakaron ila unang subayon ang mga lokal nga robbery groups nga naglihok dinhi sa Sugbo base sa ilang mga kalihukan ning mga nanglabay'ng semana una pa ang pagpanulis.

Dako ang pagtuo ni Obon nga dunay mga lokal nga kakunsabo ang maong mga tulisan, ang PIIB mobase unya sa makuhang pamahayag gikan sa mga kawani sa bangko ug pagtandi sa mga makuhang cartographic sketch karong adlawa didto sa mga rekord sa mga banggiitang tulisan sa lalawigan.

Ning paagiha matud pa ni Obon mamahimo nang masubay ang mga dayuhang tulisan kun ang mga lokal nga kauban sa grupo mailhan na usab.

Samtang ang duha ka mga gwardiya sa bangko nga sila si Henry Cuerda ug Rogelio Baterna ipailawom ni Obon sa polygraph test gumikan kadudahang mga pamahayag sa duruha kabahin sa sirkumstansya sa hitabo sanglit wala gani gyud sila makapabuto sa ilang armas.

Una ng nanggulang gidudahang grupo mao ang Ilongo Solido Group ug Waray-waray Robbery Group nga pulos dunay kapabilidad sa pagtulis ug mga bangko.

Ang Ilongo Solido Group maoy gitumbok nga mitulis sa LBP P.del Rosario, mga pawnshops , China Bank diha sa SM ug ubang mga dagkong estabilisamento niadtong tuig 2002 ug 2003 , samtang ang Waray-waray Group nabantog usab didto sa Manila.