Local contacts ni Tan

Nailhan na ang mga "local-contacts" sa gidudahang drug-kingpin sa Asya nga gitumbok usab nga financier sa nabistong mega-shabu laboratory diha sa dakbayan sa Mandaue nga si Calvin de Jesus Tan.

Si Kongresista Roque Ablan ang House Committee Chairman on Dangerous Drugs sa interbyu sa lokal nga tigbalita sa telebisyon kagahapon mibutyag nga napadala na kaniya sa mga awtoridad sa China ang mga ngalan sa giingong mga "local contacts" ni Tan.

Matud pa ni Ablan pipila kanila mga "ranking officials," mga sakop sa lokal nga tinugyanan sa balaod ug mga negosyante, apan wala klaruha kun dinhi sa Sugbo o sa kauluhan.

"Some of them are ranking officials in the government, some are ranking law enforcement officials, I am very happy to tell you that heads will roll," asoy pa ni Ablan sa ABS-CBN TV Patrol-Cebu.

Apan sa pakighinabi sa The Freeman/BANAT News kagabii sa telepono diha sa hotel nga iyang gipunduhan midumili kini pagbutyag sa mga pangalan sa maong mga personahe apan mikumpirmar nga nailhan na kung si kinsa ang maong mga tawo. Mipasumbingay usab siya nga nga dunay posibilidad nga pipila niining mga tawhana mga opisyal sa gobiyerno.

Matud pa ni Ablan gikan sa nagkalain-laing sources ang impormasyong nakuha sa iyang komitiba kalabot sa mga kakunsabo ni Tan ug giandam na karon ang pagpasakag kaso batok kanila.

Si Kongresista Antonio Cuenco sa nangaging interbyu sa Banat News nagkanayon nga dako gyud ang posibilidad nga duna gyuy impluwensyadong mga tawong kakunsabo si Tan dinhi sa Sugbo tungod sa gidak-on sa puhunan ni Tan diha sa operasyon sa Umapad dakbayan sa Mandaue ug dili kini basta lang maka-operate kun walay kasiguruhan ang proteksyon.

Niadtong pagkabisto sa maong laboratoryo naukay ang mga pipila sa mga opisyal sa Mandaue gani pipila kanila lakip na si Mayor Thadeo Ouano gipatawag sa gihimong House Inquiry sa komitiba ni Ablan sa gidudahang labing dakong gam-anan og shabu sa Pilipinas.

Bisan ang mga lokal nga kapolisan wala gani pahibaw-a sa mga awtoridad gikan sa Manila nga maoy mihimo sa malampusong operasyon diin nakasikop og onse ka mga gidudahang drug manufacturers, kadaghanan kanila mga Insik ug Malaysians.