Mga dayo ang mitulis sa LBP

Dako ang pagtuo sa direktor sa Provincial Police sa Sugbo nga mga dayo ang mga mitulis sa Land Bank of the Philippines Bogo branch niadtong nakalabay'ng gabii.

Gituohan usab ni Sr.Supt. Drusillo Bolodo dunay kakunsabong mga lokal nga kontak ang mga tulisan nga maoy mihan-ay sa mga plano sa P9.4 milyones nga pagtulis sa maong bangko.

Hinuon wala isalikway sa kapolisan ang posibilidad nga dunay inside job nga nahitabo sa maong hitabo sanglit bisan gabii na katingalahang bukas pa ang maong bangko.

Lakip sa gisubay mao ang kaluag sa mga guwardiyang sila si Rogelio Baterna ug Henry Cuerda,35, nga dali usab nga nadis-armahan.

Matud pa ni Bolodo wala pay grupong natumbok kung si kinsa ang mga nanulis apan matud pa niya dunay mga dili kumpirmadong report nga nanggawas posibleng ang Ilongo Solido Group o dili ba kaha ang Waray-waray Robbery Gang ang mihimo niini.

Ang Ilongo Solido Group maoy gitumbok sa intelligence community nga mitulis sa LBP sa dalan P.del Rosario niadtong 2001 ug 2003 ug uban pang pagpanulis dinhi sa Sugbo niadtong mga tuiga lakip na didto sa Manila diin ang Metrobank og P50 milyones niadtong 1999.

Ang maong grupo nahibaw-ang gipanguluhan ni Saldo Baluran Jismundo alyas Taba kinsa gikatahong kanhi sakop sa Red Scorpion Group.Si Baluran napalgang patay diha sa Barangay Guba ning dakbayan niadtong Septembre sa miaging tuig uban sa kaubang kanhi sundalo nga si Army Sergeant Inocentes Sintes Viña Quirog alyas Rodel Oktubre.

Gikatahong ang grupo human mabungkag ang RSG mitukod sa Kuratong Baleleng Gang didto sa Ozamis City ug human kini mabungkag gumikan sa paghingusog sa kapolisan gituohang nagtukod na usab kini og laing mga grupo.

Gituohan ni Bolodo nga ang mga responsable sa LBP-Bogo wala pa makagawas sa Sugbo ug posibleng nagtago-tago pa sa amihanang bahin sa lalawigan.