BIR legal mokooperar sa pakisusi vs. 2 ka opisyal

Mipadayag og kaandam ang mga manlalaban sa Bureau of Internal Revenues sa bisan unsang imbestigasyon nga himuon unya sa Ombudsman Visayas batok sa duha ka mga kawaning nasikop sa entrapment sa Vice Control Section sa Cebu City Police Office uban sa hepe sa Panglao Police nga si Inspector Bonifacio Tecson didto sa Bohol.

Kini maoy pasalig ni Atty. Hector Baronda, ang hepe sa mga imbestigador sa BIR sa legal department sa maong buhatan sanglit gikalipay sa BIR-7 ang gihimo ni Panglao Councilwoman Leonila Montero nga mitug-an sa kahiwian sa mga kawani sa BIR.

Si Baronda miawhag sa mga tawong dunay pagdudang wala magtinarong sa pagbayad sa buhisan sa pagtug-an sa BIR aron kapasakaan kini og kaso ug gipasalig nga ang motug-an dili mahibaw-an sa sinumbong.

Ang duha nga nasikop giilang sila si Atty. Bonifacio Ybañez ang Special Investigation Division sa BIR ug Edgar Palgan , BIR Revenue Officer, dihang gikatahong midawat sa entrapment money nga gikan kang Montero. Laing usa ka kauban sa duha nga wala motunga sa sabot mao si BIR Chief, Intelligence Operations Section Francis Mercado.

Sigun pa ni Montero sa usa ka interbyu sa lokal nga sibyaanan nga P60 mil maoy gipangayo sa duha aron areglohon ang kasong ipasaka unya sa BIR gumikan sa kadako sa balayranan gikan sa negosyong beach resort sa Panglao Island.

Si Inspector George Ylanan mibutyag sa Banat News nga kadudahan gyud ang gihimong transaksyon sa duha ngadto ni Montero sanglit matud pa niya ang usa ka restaurant dili extension sa buhatan sa BIR aron himuon ang gimbuhaton.

Si Mayor Tomas Osmeña mipahibalo kagahapon nga hayan mahatagan og insentibo ang mga sakop sa Vice Control Section, Criminal Investigation and Intelligence Branch sa Cebu City Police office nga midakop sa duha ka mga opisyal sa BIR.

Kini human irekomendar ni Konsehal Agustos Pe ngadto sa mayor nga angayang hatagan og pahalipay ang kapolisan nga mihimo sa maong operasyon.