Panuborno sa mga Comelec regl directors ipasusi

Giawhag ni Comelec-7 regional director Salud Aliganga si Comelec chairman Benjamin Abalos nga mohimo og dinaliang imbistigasyon mahitungod sa alegasyon nga pagpanuborno ngadto sa mga kaubanan nilang regional directors sa milabay'ng 2004 presidential election aron paboran ang kandidatura ni Presidente Gloria Arroyo.

Usa ka pormal nga suwat ang pormal nga gipadala ni Aliganga ngadto kang Abalos sa miaging adlaw alang sa pagpahigayon sa maong imbistigasyon,

Tumong ni Aliganga nga matin-aw ang maong pasangil ug aron masuta kun si kinsa sa ilang mga kaubanan nga regional director sa Comelec ang nakadawat sa giingong suborno ug aron kalimpyohan ang ilang buhatan gikan sa maong mga pasangil.

Gihagit sab ni Aliganga ang whistle blower sa isyung panuborno nga kanhi sakop sa buhatan sa presidential liaison officer for political affairs nga si Michael Angelo Zuce alyas Louie Zuce nga namasangil nga saksi siya sa pagpanghatag ug tag P2 milyones sa asawa ni jueteng lord Bong Pineda nga si Lilia nga kumare sa presidente didto gyud mismo sa pinuy-anan niini ngadto sa mga regional director sa Comelec usa ka bulan sa wala pa ang piniliay sa milabay'ng tuig sa pagmatuod sa maong aligasiyon.

Si Zuce naila kini nga pag-umangkon sa kontrobersiyal nga si kanhi Comelec Commissioner Virgilio Garciliano nga maoy sentro sa kontrobersiya nga mitumaw nga Hello Garci tape ug mao kini karoy usa sa mga gikonsiderar sa oposisyon nga star witness atol sa pagsugod sa impeachment proceedings batok sa presidente.

Gi-angkon ni Aliganga nga apektado gyud ang ilang buhatan niining kontrobersiya sa paglambigit kanilang mga opisyal sa Comelec sa giingong pagpanikas sa milabay'ng eleksiyon.

Si Arroyo nakakuha og mayoriya nga usa ka milyon ka botos batok ni Fernando Poe Jr. sa miaging piniliay.