Balikbayan gipatay

Usa ka gituohang "balikbayan" nga Overseas Filipino Worker gituohang gitulis dayon gipatay sa duha ka wala mailhing mga lalaki diha sa may ganghaan sa Ponce Uno barangay Carreta ning dakbayan niadtong nakalabay'ng gabii.



Patay ang biktima nga giila base sa mga nakuhang ID ug VISA credit card diha sa iyang pitaka mao si Menard Enriquez Saa, hingkod ang panuigon, wala pa matino sa kapolisan kun asa magpuyo dinhi sa Sugbo, apan base sa mga nakuhang dokumento diha sa iyang pitaka nakatrabaho kini sa Dubai kaniadto.

Sigun pa sa imbestigasyon sa Homicide Section nga gipusil sa duha ka mga lalaki sa walay igong hinungdan samtang ang biktima naglakaw sa maong dapit. Human sa pagpusil miikyas ang mga gikatahapan luwan sa usa ka taxi.

Nagtuo ang kapolisan nga posibleng gitulis ang biktima sanglit nawala na ang relo de pulso niini, mga kuwarta diha sa pitaka ug ang cellphone niini sanglit gihulagway sa mga imbestigador nga adunahan man og panamit ang biktima.

Gawas sa pagpanulis gisubay usab ang anggulong posibleng naalaang police asset ang biktima sanglit niadtong milabay'ng Huwebes sa gabii duha ka mga babayeng gituohang drug pushers ang gidakop diha sa Ponce Dos sa samang barangay diin usa nila ka kabanay gisikop usab dihang misuway og suhol og P130 mil sa mga polis sa Waterfront Police Station aron sila pabuhian .