Plete sa bus gikagubtan

Kagubot sa pag-implementar sa dugang pletihan sa bus de pasaheroan gipanglantawang mas mosamot pa kun lakip sa maigo mao ang sektor sa mga mag-uuma ug mga magbiyahian sa ilang mga produkto gikan sa mga probinsya pangadto sa mga merkado.

Kini maoy napanglantawang problema ni Cebu Mayors League Chairman Ronald Alan Sesante sa lungsod sa Dalaguete sa usa ka interbyu sa lokal nga sibyaanan kagahapon.

Gikabalak-an kun maapektuhan na ang sektor sa mga mag-uuma ug sa mga nagnegosyo og mga produkto gikan sa probinsya posibleng mokalit og sirit pagmahal ang presyo sa mga palaliton sa mga kamerkaduhan sa lalawigan.

Sa bag-ong kamanduan sa LTFRB niadto pang Hulyo 25 unta mosugod ang P6 sa unang lima ka kilometro ug P1.10 matag mosunod nga kilometro, apan ang mga bus operators dinhi sa Sugbo wala motuman niini tungod sa giingong grabeng kumpetisyon.

Niadtong Lunes Agosto 1 lang kini gipatuman sa mga bus operators diha sa South Bus Terminal tungod sa giingong dili na mapugngang pagmahal sa presyo sa lana ug mga piyesa sa sakyanan.

Gipaabot nga mosunod usab nga posibleng mopatuman sa dugang pletihan mao ang mga bus mga magbiyahian pangadto sa amihanang Sugbo sanglit mamahimo man silang dakpon sa mga taga LTFRB tungod sa undercharging.

Si Sesante nagkanayon nga bug-at kaayo ang kalit nga pagsaka sa pletihan sanglit halos modoble ang naandang pletihan sa mga tawo sa bag-ong gipatumang kamanduan sa Land Transportation and Franchising Regulatory Board.

Matud pa ni Sesante sa maong interbyu wala mapahibalo og maayo ang sumasakay kalabot sa maong usbaw maong nagkagubot sa miaging adlaw gumikan sa panaglalis sa mga pasahero ug mga konduktor.

Hinuon sa samang interbyu sa lokal nga sibyaanan pipila sa mga bus-operators sa lalawigan sa Sugbo mipahibalo nga duna silay gihatag nga usa ka semanang "grace period" sa mga pasahero nga wala pa makahibalo apan imentinar nila og singil ang bag-ong pletihan.

Samtang si LTFRB-7 Regional Director Rogelio "Jingjing" Osmeña sa pakighinabi sa Banat News mibasol usab sa operators, konduktor, ug mga drivers sa kaguliyang sa bus niadtong unang adlaw sa pagpatuman.

Matud pa ni Osmeña nga mas nalikayan unta ang panagtrokis sa mga pasahero ug taga-bus kun sa pagsakay pa lang daan gipahibalo nang daan ang mga mosakay nga ipatuman na ang bag-ong pletihan aron dili mahinayak ang mga pasahero og sakay.

Mitumaw ang panaglalis dihang ang ubang mga pasahero walay laing kwartang dala nga makapuno sa dugang pletihan tungod kay nagdahum man nga mao ra gihapon sa ilang naandang plete.

Hinuon si Osmeña nagtuo nga dili mosaler og dugay kining dugang pletihan sanglit dunay mga operators nga mopaus-os gyud sa ilang pletihan og tuyo gumikan sa kadaghan sa kompetisyon.