Halo i-black sa CH

I-blacklist ni Cebu City Mayor Tomas Osmeña ang tagdumala sa gipasirad-ang Halo Disco Bar nga nahimutang sa may North Reclamation Area ning dakbayan sa Sugbo.

Kini gawas sa tinguha ni Osmeña nga pasakaan og kaso ang nanag-iya niini gumikan sa paggamit niini og peke nga business permit aron maka-operate sa mao nilang patigayon.

Kagahapong adlawa, giaprobahan ni Osmeña ang ikaduhang closure order batok sa maong balay kahilayan gumikan sa pag-peke niini sa business permit ug ang mga tinugyanan sa Revenue Task Force pinangulohan ni Cristopher Ong maoy nikandado sa maong establisamento kagahapon sa ala 1:00 sa hapon.

Atol sa press conference ni Osmeña, gipadayag niini nga dunay daghang mga kalapasan nga nahimo ang tagdumala niini. Tungod niini, dili na niya kini hatagan pa og higayun nga subling makabukas sa maong patigayon.

Nagkanayon si Osmeña nga matigayon lang ang pagbukas og balik sa maong balay kahilayan kun dili na siya ang magsilbing mayor sa siyudad sa Sugbo.

Nasayran nga unang mi-isyu og closure order si City Administrator Bimbo Fernandez niadtong Hulyo 15 atol sa pagbakasyon sa Netherlands ni Osmena gumikan sa kalapasan niini nga wala makatuman sa safety procedure sama sa kapakyas pagbutang og fire exit.

Kini wala pay labot sa pagpamaligya og mga ilimnong makahubog bisan walay klarong permiso gikan sa Liquor and Licensing Division.

Gitakda pa usab nga pakighinabian ni Osmeña si City Attorney Rodulfo Golez aron sabutan ang pagpasaka og tukmang kaso sa korte batok sa tagdumala sa Halo Disco Bar.