Halo Disco bar ikiha gyud sa City Hall

Gitinguha ni mayor Tomas Osmeña nga mapasakaan gyud ug tukmang kaso ang tagdumala sa bag-ohay lang napasirad-an nga Halo Disco Bar nga nahimutang sa may North Reclamation Area ning dakbayan.

Kini human masuta nga niduso og fake nga business permit ang management niini sa buhatan sa mayor human una kining gi-isyohan ug closure order nga pirmado ni City Administrator Bimbo Fernandez sa petsa 15 ning bulana tungod kay nibakasiyon pa sa Netherlands niadtong tungura si Osmeña.

Gibutyag ni Fernandez nga ang gi-isyo niya nga closure order nagumikan kini sa kapakyas pagtuman sa maong kompaniya sa fire safety permit nga mao ang kapakyas pagbutang ug fire exit nga naghatag ug peligro sa mga kustomer ug empliyado sa mga panahon sa emerhensiya sama sa sunog.

Niadtong tungura gi-kwestyon sab sa milabay'ng tigum sa City Anti Indecency Board (CAIB) ang pag-operate sa maong establisamento bisan ug wala kiniy business permit gikan sa City Hall.