Kini aron malikayan ang mga kontrobersiya batok niya sama sa jueteng ug Gloria gate tape ug labaw sa tanan ang impeachment complaint nga naduso na sa kongreso.
Apan gihulagway sa mayor nga usa ka maayung lakang ang gihimo ni Arroyo paglikay sa mga intriga ug isyo nga gihapak karun sa iyang administrasyon.
Alang sa mayor dili angay'ng hisgutan sa presidente ang mga butang nga makadaot kaniya ug maghatag lang ug dugang kagubot sa nasud ilabina kay ang pundok oposisyon naila na nga gipatigbabaw niini ang politika bisan ug nahuman na ang eleksiyon.
Alang sa mayor medyo arang arang na ang pag-handle sa presidente sa maong isyu nga dili sama kaniadto sa gihimong pag-angkon nga iyang tingog ang nabutang sa Gloriagate tape nga nakapasamot pa hinuon sa maong kontrobersiya.
Gihulagway ni Osmeña ang gihimo ni Arroyo nga usa lang ka paagi aron tutokan og maayo sa presidente ang mga problema ug panginahanglan sa nasud aron makabangon kini gikan sa krisis nga giatubang inay nga magsige og tubag sa mga pasangil ug alegasiyon gikan sa oposisyon.
Samtang giklaro ni Osmeña nga dili siya uyon sa giduso nga Charter Change tungod kay gituohan niya nga dunay hidden agenda nga nagpahipi niini ilabi na sa mga tawong nagduso karon niini sama nila ni House Speaker Jose de Venecia.
Matud ni Osmeña uyon lang siya kun ipaagi sa anam anam ang pag-amendar sa Konstitusiyon ug dili tingbon sa usa lang ka higayon aron gyud mapasabot og maayu ang katawhan ug himuon ang pag-amendar sa matag probisyon niini sa matag eleksiyon nga ipahigayon.
Gihulagway ni Osmeña nga dili garantiya nga makapa-usab sa mga drug addict ug uban pang kriminal ang pag-usab sa sistema sa pang-gobyerno ug ingon man dili usab kini makatul-id sa mga kurakot nga opisyal sa gobyerno.
Si Osmeña naila na nga supporter ni Arroyo ug gani padayon kining mi-depensa og mibarug sa iyang suporta sa presidente taliwala sa mga kontrobersiya nga giatubang sa kasamtangang administrasiyon.