4 ka trak marijuana giibot

Upat ka trak nga marijuana gipang-ibot sa hiniusang sakop sa Philippine Drug Enforcement Agency 7, Balamban Police Station ug 78th Infantry Battalion nga nagbase sa lungsod sa Balamban sa milabay'ng adlaw.

Ang operasyon nilanat og duha ka adlaw gumikan sa kalayo ug kalisod sa agianan paingon sa mga hilit nga sitio sa barangay Bayong sa naasoy'ng lungsod .

Ang ronda gihimo diha sa Sitio Bagacay, Proper, Taro, ug Kabatbatan sa naasoy'ng barangay uban sa barangay Kapitan sa Bayong nga si Rizal Abanto ug mga tanod niini.

Si SPO4 Marcial Montebon, ang officer in charge sa Balamban Police nagkanayon nga sukad pa niadtong Miyerkules nila gisugdan ang operasyon sa pagsaka sa kabukiran uban sa mga sakop sa PDEA-7 pinanguluhan ni Inspector Arcellano Bañares ug mga tropa sa 78th IB pinanguluhan nila ni 1st Lt. Ale Laejo ug 2nd Lt. Chris Mendoza.

Pagkabuntag sa Huwebes na sila miabot ug gisugdan dayon ang pagpangibot sa nagkadaiyang tanaman sa marijuana sa maong lugar nga mikabat og 40 mil ka punuan ug duna pay usa ka kilong binhi (liso) sa marijuana ang nakuha gani gigamitan pa kini og upat ka mga dagkong trak aron madala sa lungsod sanglit tag-as na kini kaayo.

Matud pa ni Montebon sa mga tigbalita nga nianang gabii pa dunay mga nakit-ang mga suga sa maong mga tanaman apan gumikan sa kalisod sa lugar nagpaabot nalang sila pagkabuntag apan wala nay mga tawong naabtan ang mga operatiba.

Si Montebon nagkanayon nga 80 porsiyento sa mga molupyo sa maong barangay nananom og mga marijuana sa maong dapit sanglit layo kaayo kini sa publiko ug tuyuon kun adtuon sa polis.

Sa mga nangaging operasyon batok sa mga tanaman sa marijuana kasagarang itudlong nagmando sa mga impormante ug mga madakpan mao ang usa ka tawong nailhan lang sa ngan nga "Eddie" nga taga dakbayan sa Sugbo apan ang kapolisan miangkong wala pa sila makatino kung si kinsa ang maong tawo nga maoy mamalit sa mga marijuana.