Si Sr.Supt. Oscar Catalan ang hepe sa CIDG-7 mitug-an sa Banat News kagahapon nga nakigkita ang hepe sa ESS-Customs Police General Nestorio Gualberto kang Police Regional Office 7 Director General Eduardo Gador, CIDG-7, ug mga opisyal sa Regional Investigation and Intelligence Division (RIID), Wharf Finger sa BOC, Bureau of Fire ug PNP Maritime Police ug ubang mga unit sa BOC alang sa paghulma og hiniusang imbestigasyon kalabot sa nahitabong sunog.
Si Catalan nagkanayon nga tuyo nga sutaon sa mga kadagkuan sa ESS -BOC ug sa kapolisan kun unsay hinungdan sa maong sunog ug sa posibleng anggulong tinuyoan kini.
"General Gualberto the Chief of Enforcement Security Service of Customs created a task group, this is a fact finding committee who will be composed of various units dito sa atin galing sa BFP, CCPO, CIDG7, RIID, Maritime Police and other units from the Customs, the only purpose is to determine the cause of the fire and also to determine kung may makikitang signs na may arson na nangyari," asoy pa ni Sr.Supt.Catalan.
Mitumaw ang mga pagdudang dunay posibilidad nga tinuyo ang maong sunog gumikan sa kadaghan na sa mga anomalyang gipasangil batok sa BOC tungod sa paglusot sa mga kontrabando gikan sa pantalan.
Duna say mga pagdudang dunay buot taguan pinaagi sa maong sunog hinungdan sa mas lawom pang imbestigasyon nga gimando.
Apan sukwahi kang Gualberto, si Cebu Customs Collector Maria Lourdes Mangaoang mipadayag nga buot niyang paimbestigahon mao ang National Bureau of Investigation 7 tungod sa kapabilidad sa maong buhatan sa lawom nga imbestigasyon.
Sa nadawat nga text message sa Banat News gikan kang Mangaoang kagahapon kini nagkanayon nga dili niya tugutan ang kapolisan sa pag-imbestigar niini sanglit ang NBI mao ray iyang saligan sa imbestigasyon.
"I will not allow that , I have already requested NBI, Commissioner (Celso) Templo already called up Director Wycoco yesterday to request investigation," matud pa ni Mangaoang.
Ang direktor sa NBI-7 Medardo Delimos sa usa ka interbyu sa lokal nga sibyaanan kagahapon mibutyag nga duna na siya'y gitukod nga kaugalingong task group nga mosusi sa insidente.
Buot usab sutaon sa NBI 7 kun duna bay nahitabong arson sa maong sunog ug sa kung unsay posibleng motibo sa ingon, lakip sa iyang gibutyag nga sutaon ang kamatuoran sa mga naa sa talaang gideklarar nga naapil sa sunog sanglit matud pa niya nga dunay mga insurances nga lukatunon ang mga nanag-iya sa mga butang nga nangaugdaw.
Hinuon si Catalan mitug-an sa Banat News nga si Gualberto mimando sa task group nga panguluhan sa CIDG7 sa pakig-coordinate sad sa NBI-7.