Tabang gipasalig ni Mayor Codilla

Ormoc City - Gipasalig ni Mayor Eric "Beboy" Codilla nga ang iyang buhatan naningkamot karon nga adunay dugang panginabuhian nga mahatag niadtong mga mulopyo nga adunay kabilinggan sa ilang panglawas.

Si Mayor Codilla mihimo sa maong pasalig sa miaging adlaw sa dihang siya namulong atubangan sa mga molupyo nga adunay kabilinggan sa ilang panglawas.

Ang kalihukan nga gihimo sa may Superdome kabahin sa pagtimaan sa semana nga nag-ila sa mga tawo nga adunay kabilinggan sa ilang panglawas.

Matud pa ni Mayor Codilla nga angayan gayud og tabang kadtong mga molupyo sa dakbayan nga adunay kabilinggan sa ilang panglawas.

Nakita kini niya nga gikinahanglan ilabi na gayud ngadto sa ilang mga panimalay.

Gihimo sa mayor nga sanglitanan ang mga buta nga sa pagka karon nagsilbe nga masahista sa terminal alang sa mga FastCraft diha sa dakbayan nga gigamit sa Supercat.

Nagkanayon si Mayor Codilla nga ang paghatag og dugang panginabuhian angayan gayud kaayo alang kanila sa ingon makatabang kini sa ilang inadlaw adlaw nga panginahanglan.

Sa iyang bahin si Konsehal Fe Lladoc, chairman sa committee on social welfare sa konseho midason sa pamahayag ni Mayor Codilla.

Matud pa ni Konsehal Lladoc nga dili angayan nga himuon nga babag alang sa usa ka tawo ang kabilinggan sa lawas niini.

Gihimong sanglitanan sa konsehal ang sitwasyon sa iyang kapikas nga nagsilbe kaniadto nga konsehal og bise mayor ning dakbayan.- Pepe Sollano uban sa report ni Roberto Dejon