Matud pa ni Mangaoang sa usa ka interbyu sa lokal nga sibyaanan ang ilegal nga pag-abli sa container van sa mga sakop sa Mandaue City Police Office base usab sa search warrant sa korte maoy nakaingon nga dili na sila makapasaka og kaso batok sa mga nagpalusot niini sanglit nahimong illegally obtain na ang ebidensya.
Midugang si Mangaoang nga wala siya'y angayang ipasalamat sa MCPO sanglit sa gihimo ang maong buhatan wala makatabang alang sa kaayuhan sa BOC ug sa mga programa niini kontra smuggling.
Matud pa niya kun gipahibalo dayon siya nga dunay container van nga nasikop ang MCPO gumikan sa kalapasan sa trapiko apan kadudahan ang sulod niini ug angayang ablihan hayan makapasaka pa unta sila og kaso batok sa mga consignee niini kun ang BOC maoy nakaabli niini.
Base sa balaod, si Mangaoang nangangkon nga ang BOC lang ang dunay katungod nga makaabli sa bisan unsang kargamento nga miagi sa adwana, wala hatagi og gahum ang kapolisan sa paghimo niini gawas lang kun sila maoy himuong testigo.