Bodega sa BOC sunog; milyones ka pesos ang danyos

Milyones ang danyos sa dul-an usa ka oras nga sunog sa bodega sa Bureau of Customs nga gipanag-iya sa Cebu Ports Authority kagahapon sa kaadlawon.

Ang maong sunog gikatahong diha magsugod sa laing okupante nga Starlight Cargo Express Incorporated ug inanay nga mitapon sa bodega sa BOC ug ubang mga buhatan nga nag-abang og lawak diha sa samang edipisyo.

Base sa incident report sa District Commander sa Enforcement and Security Service sa Customs Police Capt. Alfonso Abbariao, lakip sa mga naugdaw mao buhatan sa Regional Maritime Police -7 nga dunay mga armas ug mga balang naugdaw, buhatan sa OPASCOR, Wharf Finger /Container Freight Services/CIP Stalag sa BOC.

Si Abbariao mitug-an nga naugdaw mao ang mga kinumpiskar ug giabandonang mga kargamento diha sa sulod sa maong bodega ilabi na sa container yard, container freight services apan wala maapil ang mga gikumpiskar nga mga luxury vehicles sanglit tua man kini gibutang sa gawas sa bodega.

Sa inisyal nga kasayuran nga ang nangasunog gikatahong mikabat sa 22 ka sakyanan, walo niini mga luxury vehicles nga naglakip sa upat ka Kia Sorento, duha ka Hyundai Starex ug duha ka Musso Rexton, 182 mil dolyares nga balor sa medical equipment gikan Germany ug Israel para sa Cebu Doctors Hospital ug P160 milyones nga kantidad sa mga replacement parts sa nagkalain-laing mga consignee ug daghan pang wala maapil sa kwentada sa mga danyos.

Sa sayo pa kagahapon si Cebu Customs Collector Maria Lourdes Mangaoang sa interbyu sa mga lokal nga sibyaanan kagahapon nagkanayon nga mokabat P60 milyones nga kantidad sa mga goods nga gihipos sa maong bodega ang naugdaw lakip na niini ang 20 kapin nga mga sakyanan pipila niini mga luxury vehicles ug mga motorsiklo nga giabandona ug nakumpiska ug ingon man 20 ka mga container vans nga niadto pang Lunes naabot.

Gibutyag ni Mangaoang nga plano unta sa BOC nga ibaligya karong sunod bulan ang maong mga sakyanan aron makadugang sa abot sa adwana.

Matud pa ni Mangaoang ang nangasunog nga goods, sama rag nahanaw usab ang makolektang P20 milyones nga tariff taxes gikan niini ug gibana-banang P40 milyones nga mahalin sa mga luxury vehicles nga gikatakdang ibaligya sa publiko.

Samtang si Cebu Ports Authority General Manager Mariano Martinez mibana-banang P50 milyones ang kantidad nga edipisyong naugdaw samtang padayon pang gisubay sa kabomberuhan ang ubang mga danyos atol sa pagsulat ning balita.

Si Mangaoang sa iyang bahin nagkanayon nga layo ra kaayo ang posibilidad nga tinuyo ang insidente kay matud pa niya nga didto sa Starlight Cargo Express Inc. nagsugod ang sunog, apan si Cebu City Fire Chief Esmael Codilla nagkanayon nga lakip sa anggulong ilang subayon mao ang posibilidad nga dunay arson nga nahitabo.

Giingong dali rang nakaabot ang kabomberuhan apan gumikan sa pag-ulbo sa mga bala sa armas de fuego sa Maritime Police nakabalda kini sa mga bombero nga moatraka sanglit delikado ang lugar.