Tulisan midagan kay nailogan og pusil

Mikabad og dagan ang usa ka tulisan dihang nailog ang iyang armas sa tawong iyang gitulis didto sa Inayagan, Naga niadtong Martes sa hapon.

Ang biktima nga si Primitivo Natad, 36, minyo, taga Inayagan gipusil sa wala hiilhing tulisan apan wala maigo.

Matud pa ni SPO1 Arnulfo Himota, desk officer sa Naga Police Station nga wala usab makatulis og kuwarta ang tulisan gikan sa biktima.

Kini dihang gilayog sa biktima ang maong tulisan nga mition kaniya (biktima) og armas de fuego.

Sa ilang paglinayogay kay ilogon unta sa biktima ang armas, nakabuto kini.

Gumikan sa kasipa sa buto nakurat ang tulisan ug sa iyang kahadlok mikabad siyag dagan pahilayo sa tindahan sa biktima.

Gitubag sa kapolisan ang maong alarma human sila pahibaw-a ni Kapitan Narciso Tablate sa Inayagan bahin sa hitabo.

Gisaysay sa kapitan gna mipalit og sigarilyo ang usa ka tawo sa tindahan sa biktima.

Apan dihang mikuha og sukli ang biktima sa kuwartang gibayad sa maong tawo kalit lamang mipahibawo kini nga "tulis" uban sa pagtion ngadto sa biktima sa .357 revolver.

Dihang gipangayo sa tulisan ang kuwarta sa biktima, gilipat kini sa biktima ug dihadiha iyang gisuwayan og ilog ang armas.

Didto nagsugod ang linayogay sa duha, apan nasabtan sa tulisan nga maglisod siya tungod sa kaabtik sa biktima, mikaratel kinig dagan ngadto sa duha niya ka kaubang nagsakay og motorsiklo.

Gisuwayan og gukod sa mga barangay tanod ang mga tulisan apan wala na kini igkita.q