Calvin gusto mo-piyansa

Nagtinguha sa pagduso og petisyon alang sa pagpiyansa ang abogado sa giingong pinanser sa mega shabu laboratory nga gibalhog karon sa modernong bilanggoan sa Cebu Provincial Detention and Rehabilitation Center (CPDRC) sa Kalunasan sa siyudad sa Sugbo.

Si William delos Santos nga abogado ni Calvin de Jesus Tan ang gikatakdang moduso sa mao niyang petisyon ngadto kang Judge Marilyn Yap sa Branch 28 sa Regional Trial Court (RTC-7) nga nagbase usab sa maong siyudad.

Si Tan nga nag-atubang sa kaso nga kalapasan sa Akta Republika 9165 nga maoy gitumbok nga pinanser sa mega shabu laboratory ang kauban sa lain pa nga 11 ka nadakpan atol sa pagronda niadtong Septiyembre 24 sa miaging tuig.

Higpit nga gipatuman ang siguridad sa detention cell sa CPDRC nga iyang gitanggongan tungod kay giisip kining high risk nga piniriso.

Si Jail Warden Alfredo Abella nga gikahinabi sa mga tigbalita ang mitug-an nga sukad sa pagkatanggong ni Tan sa maong bilanggoan ang bugtong nakaduaw niini si Lito Ruiz nga bana ni 6th district Representative Nerissa Soon Ruiz.