Manghod miluwas sa maguwang kuryentihan sa hayhayan

Manghod namatay human misuway og luwas sa iyang maguwang nga nakuryentihan sa hayhayan gumikan sa ilegal nga gikabit nga linya sa kuryente nga mipilit didto kagahapon sa buntag diha sa Barangay Sima lungsod sa Dumanjug.

Ang namatay mao si Isadora Sosobrado, 20 , molupyo sa maong lugar samtang milandig sa tambalanan ang iyang maguwang nga si Evangeline Sosobrado,32, minyo ug nagpuyo sa maong dapit.

Sumala pa ni SPO1 Joselito Abella sa Dumanjug Police dinhi sa Banat News si Evangeline ug Isadora kasamtangang nanghayhay sa mga linabhang sapot dihang si Evangeline kalit lang mikirig.

Si Isadora sa pagkakita sa nahitabo sa maguwang daling miduol ug misuway unta sa pagbira niini apan siya hinuoy nadut-an sa boltahe sa kuryente ug si Evangeline nalang maoy gilatayan sa kuryente.

Lagom na ang kalawasan ni Isadora ug wala nay kinabuhi dihang natangtang silang duha gikan sa hayhayan samtang daling gidala si Evangeline sa Barili District Hospital.

Nasuta sa kapolisan nga dihay kable sa kuryente nga nadiskubrehang ilegal nga gikabit ang nabugto ug nalambod sa gihayhayan sa mga biktima nga wala nila mabantayi.

Gisubay pa karon sa kapolisan kung kang kinsang balay kadtong linya gikabit apan nagtuo si Abella nga posibleng sa balay ra sa mga biktima kini gikan.