Misuway'g lugos gisikop; Uyoan miinterbener giapil og dakop

Konduktor nga gidudahang rapist gidakop human misuway og lugos sa usa ka dalagang tinun-an sa kolehiyo diha sa boarding house sa biktima samtang gidakop usab ang uyoan sa suspek kinsa miinterbiner sa mga polis kagahapon sa buntag diha sa barangay Sambag Uno ning dakbayan.

Nagtingkagol karon ang manag-uyoang sila si Rex Lañujan, 19, kundoktor sa PUJ ug Alberto Ligaray Arnado, hingkod ang panuigon pulos mga molupyo sa maong barangay.

Sigun pa sa kapolisan ang 20 anyos nga biktima ug tinun-an sa kursong Hotel and Restaurant Management sa usa sa mga kolehiyo dinhi sa dakbayan kasamtangang nanghinguko diha sa gipuy-ang boarding house dihang miabot ang suspek.

Giingong wala lang kini tagda sa biktima sanglit nagtuo lang siyang bisita sa mga ka-boardmate niini si Lañujan apan nakugang lang siya dihang miabot kini duol sa iyang lawak kalit siyang gigakos sa suspek ug gihagkan.

Sa kahadlok misiyagit ang biktima ug nangayog pakitabang sa iyang iyaan nga naa diha sa kasilyas. Apan gikatahong giparok sa suspek ang dalaga makadaghang higayon diha sa sementadong sawog dayong karatel og dagan kanaog sa hagdan apan nakit-an kini sa mga silingan nga daling nakatawag og polis.

Si Lañujan naabtan sa kapolisan diha sa usa ka karenderiya nga nagkaon susama'g walay nahitabo apan positibo kining gitumbok sa biktima. Ang uyoan sa suspek nga si Arnado misuway unta sa pagpugong sa mga polis maong giapil kini og sikop ug nakuhaan usab kini og usa ka swiss knife.