Talagsaon nga kahayag kit-an

Nakugang ang mga residente sa Sityo Mahayay barangay Candulawan dakbayan sa Talisay tungod sa ilang nakitang kahibulongang kahayag nga mipakita sa kawanangan niadtong Sabado sa alas 9:00 sa gabii.

Midangat og 15 minutos, nawagtang ang kahayag sa dihang mihabuhabo na.

Usa sa nakakita sa maong kahayag mao si Insp. Ricardo Nayne kinsa nadestino sa Talisay police station ug residente sa maong lugar.

Matud pa ni Nayne nga ang nahisgutang kahayag nagliyok-liyok diha sa kawanangan apan ang eksperto alang sa siyensa maoy makadeterminar niini.

Matud pa usab ni Nayne nga ang iyang mga silingan naglumba og saka ngadto sa bungtod nga bahin sa ilang lugar aron motan-aw sa maong kahayag.