Kalasero sa hantak gi-ulo pagpusil

Kalasero sa hantakan ug gidudahang runner og shabu gipusil sa ulo patay diha sa hantakan sa Sitio Bamboo, Barangay Inayawan ning dakbayan kagahapon sa kadlawon.

Upat ka bala diha sa luyong bahin sa iyang ulo ug bitiis ang gikamatyan sa biktimang si Bimbo Kadlawon, 29, ulitawo ug molupyo sa maong lugar ug maoy mangalas sa mga nagsugal og hantak diha sa iyang dapit.

Ang biktima gikatahong nabilanggo na sa Bagong Buhay Rehabilitation Center tungod sa kasong robbery niadtong tuig 2003 ug bag-uhay lang kini nakagawas.

Usa ka wala mailhing lalaking nagtaptap og facetowel sa nawong ang gitumbok nga mipusil sa biktima ginamit ang usa ka kalibre 45 pistola samtang si Kadlawon nagtalikod ug nag-atubang sa hantakan.

Gituohang ang suspek nakaaway sa biktima sanglit dihang gipusil niini si Kadlawon militok pa kini og pulong nga "Isog ka?" dayong dul-it sa ulo sa biktima. Si PO2 Bobby Escarlan sa Homicide Section nagkanayon nga dunay mga impormasyon nga manambling ang biktima sa bayad sa shabu nga isugo kaniya.

Dihay upat ka basiyo sa kalibre 45 nga bala ang napalgan sa kapolisan diha sa crime scene.

Human sa pagpusil daling miikyas ang suspek palayo sa maong lugar samtang gisubay na karon sa kapolisan ang pag-ila sa namusil.