Habalhabal driver gipusil sa ig-agaw

Habal-habal drayber giunay og pusil sa iyang ig-agaw gumikan kay naobertikan sa biktima human sa ilang ginukdanay luwan sa ilang mga motorsiklo nga miabot sa may merkado sa Barangay Cogon lungsod sa Carmen niadtong Sabado sa buntag.

Wala na makaabot nga buhi sa tambalanan ang biktimang si Danilo Sencio, hingkod ang panuigon, minyo ug molupyo sa Barangay Ipil sa naasoyng lungsod human kini pusila sa ig-agaw nga si Gilbert Sencio molupyo usab sa naasoyng lugar.

Nasutang ang biktima nag-sideline lang og pagmaneho sa habal-habal samtang nagpaabot kini nga makasakay pagbalik sa barko sanglit usa man kini ka seaman.

Sigun pa ni SPO1 Alan Abuton sa Cebu Provincial Police Office Operations Division ang biktima luwan sa motorsiklo nga gigukod sa suspek kinsa luwan sa usab sa motor.

Si SPO2 Mario Giangan ang imbestigador sa maong kaso mibutyag sa Banat News base sa alegasyon sa inahan sa suspek nga hinungdan sa panag-initay sa duha ka manag-agaw mao ang pag-ekis-ekisay sa ilang tagsa-tagsa ka gimanehong habal-habal diha sa taytayan sa Barangay Cogon nga miresulta hinuon sa ilang panagsaghid niadtong Huwebes.

Nianang pagka Sabado sa buntag giingong nagkasunod usab ang duha diin gikatahong kalit nga giobertikan sa biktima ang suspek ug gialegar usab nga kalit lang kining miwitik og kumo sa bukton sa suspek dayong sutoy.

Wala makaagwanta ang suspek kinsa duna diay gisuksok nga armas, iyang gigukod ang biktima ug naabtan kini didto sa merkado sa dayon na untang mokanaog sa motorisklo ang biktima gipusil niya sa tuong kilid duha ka higayon.

Ang suspek daling misibat sa dapit samtang gideklarar nga dead on arrival ang biktima sa Danao City General Hospital.