Alarma sa linog karong Hulyo 28

Ang buhatan sa National Disaster Coordinating Council (NDCC) ang mopahigayon sa dinungan nga pagpaalarma sa mahitabong linog sa aron sa pagsuta sa kapasidad sa pagluwas sa katawhan nga mahimong mga biktima sa higayon nga mahitabo ang kalit lang niining pagtay-og.

Gikatakda kining mahitabo sa alas 10 sa buntag karong Huwebes sa Hulyo 28 niining tuiga isip kabahin kini sa mga kalihokan sa kasaulogan sa National Disaster Month nga gisugdan niadtong Hulyo 1 niining tuiga.

Dungan kini nga pagahimoon ang maong kalihokan sa NDCC ug sa RDCC dinhi sa rehiyon nga mao usab ang mosuperbisar sa mga disaster coordinating council sa mga dakbayan, lungsod ug kabarangayan.

Si Provincial Disaster Coordinating Council (PDCC) pinaagi kang Gobernador Gracia ang nakighiusa sa buhatan sa RDCC dinhi sa Sugbo alang sa pagpasiugda sa maong kalihokan.

Sa nahibaw-an sa Banat News nga dinhi sa Sugbo ang buhatan Regional Disaster and Coordinating Council ( RDCC-7) maoy mopasiugda niini nga pagaapilan kini sa mga tinun-an sa tulunghaan ug ingon sa mga kawani sa pipila ka pribadong establisamento nga nakasalmot sa miaging mga pagbansaybansay nga gipahigayon.

Dinhi sa Sugbo maoy giila ang pipila ka mga mosalmot niini ang 11 ka mga tulunghaan kinsa mopakita sa ilang kahanas sa ilang nakat-onan sa gipasiugdahang evacuation drill.

Nalakip usab sa maong mga pagbansay sa mga nahimong sakop sa rescue team ang pagluwas sa mga biktima sa pagbaha, landslide sa yuta, sunog ug uban pang katalagman nga mahitabo niini.