Koreano gibikogan?

Ang anggulo bahin sa pagkaparok o kaha gibikogan maoy gipunting nga malagmit hinungdan sa kamatayon sa usa ka estudyanteng Koreano didto sa usa ka kaligoanan sa Pook, Talisay City niadtong Huwebes.

Si SPO2 Jose Noel Factores, desk officer sa Talisay City Police Station, mibutyag sa Banat News nga unya na masuta kining tanan kon kaawtopsihan na ang patay'ng lawas ni Jay Hyong Choi.

Si Jay gideklarar nga patay na sa Talisay District Hospital sa alas 3:45 sa hapon, human malumos sa Aqua Cainta Resort sa Pook.

Kini human mosawomsawom sa ala 1 sa hapon nga busog kaayo human maniudto ang biktima.

Matud pa ni Factoran nga ang nahinabi nilang lifeguard nga si Ricardo Cellon, 23, taga Pook, mitug-an nga kalit kaayo ang maong hitabo.