Ang inahan ni Paco Larañaga nga si Margarita sa pakighinabi sa lokal nga sibyaanan nagkanayon nga human makadesisyon ang korte sa dangatan sa iyang anak, ilang duolon si Arroyo apan dili aron pagpangayo og pabor.
Giklaro ni Margarita nga dili sila moduol kang Arroyo aron hangyuon nga hatagan og presidential pardon ang iyang anak kundili aron ipahibalo kang Arroyo nga wala gyuy sala ang iyang anak.
Si Paco Larañaga uban sa lain pang upat ka higala nga sila si Josman Aznar, Rowen Adlawan, Alberto Caño ug Ariel Balansag samtang ang managsuong sila si James Andrew Uy gisentensyahan og 20 ka tuig ug James Anthony Uy kasamtangan pang gihashasan gumikan kay kini nangangkong minor pa ang edad dihang nahitabo ang paglugos.
Samtang ang inahan sa mga biktimang si Thelma Chiong kinsa maoy tsirman sa Crusade Against Violence nahinangop sa pagselyo sa desisyon sa Korte Suprema niadtong Huwebes.
Masaligon si Chiong nga dili hatagan og pabor ni Arroyo kun modangop ngadto sa Palasyo si Ginang Larañaga sanglit matud pa ni Chiong nakahibalo gyud si Arroyo sa pait nga nahiaguman sa iyang mga anak.
Ang maong kaso milanat og walo ka tuig apan hangtud karon wala pa makita ang patay'ng lawas ni Jacqueline nga uban sa iyang igsuon gidagit ug gilugos niadtong Hulyo 16,1997 diha sa dalan Archbishop Rosales sa Ayala Business Park.
Si Marijoy napalgan ilawom sa pangpang didto sa Carcar nga nagkalasog-lasog ang lawas niini.