Ang nangatanggong karon sa karsel sa kapolisan giilang sila si Vincent Cavite Purgatoryo,30, ulitawo ug molupyo sa V.Rama Avenue barangay Guadalupe ning dakbayan ug kauban niining si Michael Lendio,29, taga dalan J.M.Basa barangay San Nicolas ning dakbayan.
Sigun pa ni PO2 Deo Clarin ang imbestigador sa Punta Police Station sa panaghinabi sa Banat News ang mga suspek luwan sa usa ka motorsiklong may plakang ZH-4846 nga usa ka STX Yamaha dihang naagi sa checkpoint diha sa dalan Sabellano sa naasoy'ng barangay.
Dihang gipara gikatahong miminor pa ang driver nga si Cavite apan pagduol sa mga polis kalit niining gipasutoy ang motor apan nakuptan kini sa luyo sa mga polis hinungdan sa pagkatikalbong sa motor.
Sa pagrekisa sa ilang kalawasan nakuhaan si Cavite og usa ka kalibre 45 pistola nga may magazine nga may sulod nga lima ka buhing bala ug usa ka paketeng shabu samtang laing usa usab ka paketeng shabu ang nakuha kang Lendio.
Usa ka litrato sa usa ka lalaking nagsuot og barong tagalog ang nakit-an diha sa bulsa sa usa kanila nga maoy nakapaduda sa mga polis maong ila kining gisukit-sukit apan dili managtukma ang ilang mga tubag.
Dangtan pila ka mga gutlo sa tantong pagpangutana gikatahong miangkon ang duruha nga sila mga gun for hire ug ang tawong naa sa litrato usa ka negosyante nga ilang tipion diha sa usa ka buwangan sa Sugarland Barangay Kimba dakbayan sa Talisay niadtong higayuna kun wala pa sila madakpi.
Matud pa ni Clarin dugay nang gipanid-an sa mga suspek ang kalihukan sa maong tawo ug niadtong adlawa na kini unta tipion.
Midumili hinuon ang kapolisan sa pagbutyag sa pangalan sa maong negosyante kinsa giingong gikan pa usab sa abroad aron kalikayan ang kabalaka sa mga kabanay niini ug ingon man ang tawong misugo sa mga suspek.
Si PO2 Clarin midugang nga may kalambigitan sa selos ang hinungdan ug ang duruha bayran sa kantidad nga P40 mil diin giingong ang P10 mil gani niini ila nang nadawat.