Gibiyaan sa misis naghikog

Lalaking gibiyaan sa iyang asawa ug mga anak naghikog ug patay nang nakaplagan sa iyang mga kabanay diha sa lawak niini kagahapon sa kaadlawon sa Sitio San Vicente Barangay Mabolo ning dakbayan.

Ang biktima giilang si Roel Abisa, molupyo sa maong lugar kinsa napalgang nagbitay ginamit ang pisi diha sa iyang liog nga gihikot didto sa beam sa iyang lawak.

Sa pagsukit-sukit sa Homicide Section diha sa mga kabanay niini gikatahong duha na diay ka higayon nga misuway og hikog si Abisa apan pulos kini pakyas.

Giingong nagsugod ang paghunos niini sa iyang kinabuhi dihang gibiyaan siya sa iyang asawa ug tulo ka mga anak nga namauli didto sa Daanbantayan ug gumikan usab kay wala kini klarong panginabuhian.

Gikatahong walay namatikdang kadudahang lihok si Abisa niadtong milabay'ng gabii sanglit siya paman gani ang giingong mibuhat sa mga buluhaton sa panimalay.

Wala hinuoy nakitang foul play ang kapolisan sa insidente.