Proteksiyon sa turista

LEYTE - Gipaningkamotan karon sa rehiyonal nga buhatan sa Department of Tourism ingon man sa nagkalain-laing nasudnong buhatan og pribadong sektor nga mapatuman ang programa nga gitumong aron paghatag og igong proteksyon sa mga bisita sa probinsya ilabi na gayod sa mga turista.

Si Regional Director Karina Rosa Tiopes sa DOT-8 miingon nga mao kini karon ang ilang gipaningkamotan human usab nila ilusad ang programa nga gitawag og Safety of Tourist Operational Program kon STOP.

Nakita ni Tiopes nga usa kini sa gikinahanglan kaayo human usab nila gilusad ang programa nga nagdani sa mga turista nga muduaw sa probinsya.

Samtang mao kini karon ang ilang gipalapdan pag-ayo, nakita usab nila nga kinahanglan ipakita nila ngadto sa mga turista nga luwas ang ilang pagduaw sa probinsya.

Midugang si Tiopes nga ang kalampusan sa maong programa magbase usab unya sa suporta nga ihatag sa nagkalain-laing sektor.

Siya mitataw nga kini dili tanan isangon ngadto kanila nga gimbuhaton sa DOT.

Nahibaw-an nga nagkalain-laing sektor ang mipasalig nga musuporta niini.