60-anyos nga pusher nasikop, way piyansa

Walay piyansa nga girekomendar ang korte alang sa temporaryong kagawasan batok sa usa ka 60 anyos nga lalaki nga nadakpan sa kapolisan tungod sa kaso niining giatubang nga paghupot ug pagpayuhot og shabu.

Nadakpan kini ala una pasado ang takna sa hapon niadtong miaging adlaw didto sa panimalay niining gipuy-an sa sitio Grancina sa barangay Opao, siyudad sa Mandaue.

Ang nadakpan mao si Placido Abres, 60 anyos, minyo nga lumad nga taga Guiwanon. Samar ug temporaryong nagpuyo sa nahisgotang lugar.

Ang team sa kapolisan nga gipangulohan ni SPO4 Jose Dilao nga mga sakop sa Intelligence and Investigation Bureau sa Mandaue City Police Office (MCPO) maoy nakadakop sa suspetsado.

Si SPO4 Dilao ug mga kauban midakop kang Abres pinaagi sa warrant of arrest nga giluwatan ni Judge Augustin Vestil sa Regional Trial Court (RTC-7) sa nahisgotang dakbayan.

Samtang laing nadakpan mao si Brexter Hortizano, 32 anyos, ulitawo nga nagpuyo sa Zone Tambis, Paknaan sa mao gihapong dakbayan kinsa gidakop usab nila SPO3 Benigno Aldefolla sa Presinto 6 sa Canduman Police Station sa mao gihapong siyudad.

Si Abres ug Hortizano nag-atubang og kaso nga kalapasan sa Section 5, Article 2 sa Republic Act 9165 kun Comprehensive Dangerous Drugs Act of 2002.