Homicide ang kiha vs polis

Ang kasong homicide batok sa usa ka polis nga nakapusil patay sa tawo nga iyang dakponon nga unang gisang-at sa buhatan sa piskalya giendosar na ngadto sa Ombudsman Visayas.

Kini ang nahibaw-an sa Banat News kang SPO2 Jun Bataluna, imbestigador sa Presinto 4 sa Casuntingan Police Station sa Mandaue City Police Office (MCPO) sa follow up nga gihimo.

Matud pa ni SPO2 Bataluna nga ilang gisang-at sa piskaliya ang kaso nga homicide batok kang PO3 Noe Rondina nga nadestino sa Base Police sa Regional Police Office (RPO-7) kinsa nagpaalim karon sa Chong Hua Hospital sa siyudad sa Sugbo human gidunggab sa iyang dakponon.

Apan ang piskaliya sa siyudad sa Mandaue miluwat og kamanduan sa pagbalhin sa kaso ngadto sa Ombudsman Visayas sanglit naglambigit man sa trabaho ni PO3 Rondina ang nahitabong pagpamusil niini.

Sa nahibaw-an nga napusilan patay ni PO3 Rondina si Eduardo Solino alyas Kanu kinsa nagdala og kutsilyo dihang gi-serve unta niini ang warrant of arrest nga giluwatan sa korte.

Gidala si PO3 Rondina sa Cortes General Hospital sa maong dakbayan apan human sa pasiunang pagtambal girekomendar sa mga doktor nga ibalhin kini sa Chong Hua Hospital sa siyudad sa Sugbo alang sa tukmang pag-atiman.