Danny Limotan nasikop didto's Bukidnon

Ikaduha sa talaan sa mga notadong tulisan dinhi sa dakbayan sa Sugbo nga si Danny Limotan nasikop na sa mga sakop sa Criminal Investigation and Intelligence Branch sa Cebu City Police Office didto sa Purok 13 Barangay Poblacion Valencia City didto sa Mindanao kagahapon sa hapon.

Ang suspetsadong Limotan gitumbok nga kanhi kauban sa notado usab nga si Rey Torres kinsa usa na ka imbalido karon human putli sa batiis gumikan sa pagkapusil sa CIIB kaniya didto usab sa Mindanao.

Ang mga sakop sa nine-man team sa CIIB armado og warrant of arrest batok kang Limotan misubsob sa pagpangita kaniya didto sa maong dapit human makakuha og kasaligang impormasyon ug pinaagi sa bag-ong tracking device nga naa sa kapolisan.

Si Supt.Pablo Labra nga maoy nangulo sa operasyon mitug-an sa The FREEMAN/Banat News sa pakighinabi kagahapon nga diha magpuyo sa usa ka payag sa tunga-tungang bahin sa katubhan sa maong lugar si Limotan kinsa nangalyas og pangalang Eric J. Limotan maong ila kining giatangan.

Tuod man miagi kini luwan sa motorsiklo og daling gisita sa mga polis apan wala kini mohunong ug misutoy hinuon pagdagan maong nahitabo ang ginukdanay ug shootout dihang misulod si Limotan sa katubuhan.

Apan dangtan pila ka gutlo nakorner kini sa mga polis maong mitahan nalang kini sa iyang kalibre 45 nga armas ug misurender.

Si Limotan nga lumad nga taga Nabalan, Tucuran Zamboanga del Sur dugay nga gilambigit sa mga insidente sa pagpanulis dinhi sa lalawigan susama ni Torres.

Pipila sa mga operasyon kaniadto ni Torres dinhi sa Metro Cebu kauban niini si Limotan apan gumikan sa panagbangi sa bahinay ug sa babaye nagkabingkil ang duruha ug nagbuwag ug mihimo'g kaugalingong mga grupo.

Labing ulahing pagpanulis nga gidudahang binuhatan ni Limotan mao ang pagtulis sa payroll nga P2 milyones niadtong nakalabay'ng buwan diha sa dalan A.S.Fortuna dakbayan sa Mandaue.

Si Torres kinsa nadakpan sa kapolisan maoy posibleng mihatag og impormasyon sa mga kalihukan ni Limotan ug kun asa kini magtaguan panahon nga init ang kapolisan kanila.

Si Torres usab ang mihatag kang CIIB Chief Pablo Labra og mga mahinungdanong mga impormasyon nga ang mga bangko sa Land Bank of the Philippines ug Metrobank maoy mga paboritong target sa ilang grupo.

Gikatakdang moabot karong adlawa si Limotan uban sa mga polis ug ipresentar sa mga sakop sa media. Australian napalgan patay sa apartment Ni Brenda D. Batuto

Patay na nga napalgan sa iyang kapuyo ang usa ka Australian national niadtong Domingo sa gabii diha sulod sa iyang apartment nga gipuy-an sa Sityo Nonoc, barangay Tabunok siyudad sa Talisay.

Ang maong patay giila nga si John Graham Frederick, 60 anyos, kinsa gituhoan nga namatay sa sakit nga tuberculosis (TB).

Si Josephine Lequin, 29 anyos duha na ka tuig nga kapuyo ni Frederick maoy mitaho ngadto sa kapolisan sa Talisay sa nahisgutang insidente. Matud pa ni Lequin nga gikan siya sa biyahe gikan mipauli sa Tabongo, Leyte, niadtong petsa 16 niining buwana, ug pagbalik niya sa apartment nga ilang gipuy-an ni Frederick niadtong Domingo sa kaadlawon naabtan na lang niya kini nga naglingkod sa sofa diha sa sala nga wala nay kinabuhi.

Sa atubangan sa patay'ng lawas ni Frederick ang mga tambal sa iyang sakit ug ang medicine instrument nga gamiton sa pagtumar og tambal sa naulahi.

Base sa imbestigasyon sa mga kapolisan nga si Frederick naadmit sa Chong Hua Hospital niining dakbayan niadtong Mayo 2004.

Niadtong Enero niining tuig naadmit kini sa Cebu Doctor's Hospital ug ngadto sa Perpetual Soccor Hospital niining dakbayan, diin si Frederick girekomendar nga mo-undergo og radiation therapy ug chemotherapy tungod sa balatian niini.