Pag-edukar bahin sa dengue

Bohol - Nagpadayon karon ang kalihukan sa mga tinugyanan sa panglawas sa probinsya ngadto sa mga molupyo sa kalungsoran aron sila malikay sa sakit nga dengue.

Si Gobernador Erico Aumentado miingon nga niining panahon sa ting-ulan angayan gayud kaayo nga mapakita nga ma-edukar na pag-ayo ang katawhan.

Nagkanayon si Aumentado nga usa sa mga paagi aron sa ingon malikay ang katawhan sa sakit nga dengue mao ang pag-edukar kanila.

Matud pa ni Aumentado nga ang pagsaka sa sakit nga dengue gikinahanglan sa pagpakabana sa tanan nga katawhan diha sa kabarangayan.

Midugang si Aumentado nga kon mahibawo ang katawhan sa angayan nga buhaton dako ang iyang pagtuo nga mamenus ang sakit nga dengue.

Ang rehiyonal nga buhatan sa Department of Health mipalapad karon sa ilang kalihukan pag-edukar sa katawhan bahin sa angayan nga buhaton bahin sa sakit nga dengue.