Magpabuto kun mahubog gitipi

Lalaking kanunay magpabuto og armas kun mahubog gitagod-tagod og tigbas ug dunggab diha duol sa iyang balay sa umahan sa Sitio Tagaytay, Barangay Adlawon ning dakbayan niadtong milabay'ng gabii.

Patay nang nabangalan sa guwardiya sa cock farm ni Alex Tan nga si Jennifer Abella ang biktimang si Lope Arejola, 54, ulitawo, nanguma ug lumolupyo sa maong lugar.

Si Arejola dunay daghang samad tinigbasan sa tibuok kalawasan ug agi usab sa daghang pagpanunggab nga gituohang maoy nakaingon sa hinanali niining kamatayon.

Si PO3 Bobby Escarlan sa Homicide Section mitug-an sa Banat News nga dihay usa ka silingan sa biktima ang nakadungog og buto-buto sa armas diha sa dapit diin mapalgi ang biktima.

Hinuon kay naanad na ang mga residente sa kinaiya sa biktima nga magpunay og pabuto wala na lang panumbalinga ni Noel Codilla, usa sa mga nakadungog sa buto sa armas, matud pa ni Escarlan.

Dangtan og pila ka gutlo nabangalan sa nagpatrolyang si Abella ang biktima diha sa maong lugar nga nabulit og samad sa kalawasan nga nag-ubo sa yuta ug wala nay kinabuhi hinungdan nga gipahibalo kini dayon sa kapolisan.

Sigun pa ni Escarlan, dihay upat ka basiyo sa kalibre 38 nga bala ang napalgan dili layo sa crime scene, nagduda ang kapolisan nga si Arejola ang nagpabuto niini apan wala lang matino kun hain na ang armas nga gigamit niini.

Midugang si Escarlan nga posibleng dunay tawong nasuko sa biktima ug giatol nga nag-reload kini dihang kalit nga gitigbas ug gidunggab hangtud mapatay.