Giila ang biktima nga mao si Francisco Antona, 67, ulitawo ug molupyo sa naasoy'ng lugar ang nasulod sa NBP gumikan sa kasong murder, asoy pa sa kapolisan.
Si PO3 Ramuel Banogon mibutyag sa Banat News nga usa ka wala pa mailhing gikatahapan ang kalit nga misulod sa panimalay sa biktima niadtong milabay'ng adlaw ug kalit lang kining gipusil diha sa tuong bahin sa nawong.
Ang bala milapos diha sa iyang baba hinungdan sa hinanali niining kamatayon, gidudahang personal nga dunay kalagot sa biktima ang gikatahapan nga buot mobawos.
Ang biktima gikatahong napusilan usab kaniadto diin naigo ang kamot ug batiis niini apan walay tawong iyang nakiha kay wala kini makaila sa mipusil kaniya apan gidudahang mga tawo kadtong dunay kaligutgot kaniya.
Matud pa ni Banogon kanunay nga maalarma sa barangay ang biktima tungod sa pagpanghasi niini ilabi na kun mahubog, gawas pa niana gihulagway nga estriktuhon ang batasan niini sanglit bisan mga pag-umangkon niini iyang makaaway kanunay. "Sige lang na siya maalarma sa diha sa ilang barangay kay bugoy-bugoy man, labi nag mahubog," asoy pa ni Banogon.
Usa sa mga pag-umangkon(ngan gipugngan) sa biktima ang gipailawom sa paraffin test human kini giimbitar sa kapolisan diha sa ilang buhatan alang sa pagpangutana sanglit gikatahong kini maoy labing ulahing gikaaway niini sa wala pa mahitabo ang pagpatay.
Usa ka slug sa bala ang napalgan sa crime scene samtang gisubay pa sa kapolisan ang motibo sa pagpatay.