Si Garcia nagkanayon nga bisan kun nagkinahanglan kini'g taas-taas nga proseso, apan kon mao nay masagop sa nasud makabintaha pag-ayo ang mga lalawigan sa nagkalainlaing dapit sa nasud.
Kini tungod kay sa sistemang federal, ang kagamhanan na sa lalawigan maoy magbuot kun pilay ibahin niini ngadto sa panudlanan sa nasudnong kagamhanan.
Lahi sa kasamtangang presidential system diin sa katibuk-ang kinitaan sa mga lalawigan nga ihungit ngadto sa panudlanan sa nasud, 40 porsiyento na lang niini ang mahibalik ngadto sa mga lalawigan.
Ang nakaparat niini matud pa ni Garcia nga kun daghan ang mga probinsya mogamay usab ang pahat sa matag usa tungod kay parehason man pagbahin ang 40 porsiyento nga bahin sa lokal nga kagamhanan gikan sa kinitaan niini sa katibuk-an.
Matud pa ni Garcia nga mas dako og pundo ang nasudnong panudlanan ning sistema karon ug ang matag probinsya sama na lang sa mga kuyabog nga tigistigisan na lang og hungit sa ul-og sa iyang inahang langgam.
Maoy hinungdan nga sama sa gisagop nga sistema sa Estados Unidos nga federal system, matag probinsya didto pulos malambuon kaayo ang dagan sa ekonomiya.
Hinuon alang kang Garcia nga kun ibton gyud sa mga oposisyon si Presidente Gloria Arroyo sa Malacañang pinaagi sa ilegal ug supak sa batakang balaod nga paagi tukoron usab sa mga gobernador sa Kabisay-an ang usa ka ilegal nga Visayas Republic.
Apan mogama kini og kaugalingong Konstitusyon, matud pa ni Garcia.