Lahugay sa Comelec iduso ni Cuenco

Si Kongresista Antonio Cuenco sa habagatang distrito naglaraw nga sa iyang previlege speech sa pagbalik sa sesyon sa kongreso pipila ka adlaw human sa State of the Nation Address ni Presidente Gloria Arroyo iyang isugyot ang dinaliang lahugay sa Commission on Elections.

Si Cuenco sa pakighinabi sa The Freeman/Banat News nagkanayon nga gumikan niining kontrobersya sa wiretapping sa panag-istoryahay sa pangulo ug sa usa ka opisyal Comelec mitumaw ang pagduda sa kredibilidad sa maong buhatan.

Ang oposisyon mipasangil nga ang panagsabot ni Arroyo ug Comelec commissioner Virgilio Garcillano ebidensya kadto nga nanikas ang administrasyon niadtong 2004.

Nunot niini daghan ng nagduda sa kamatinud-anon sa mga opisyal sa maong ahensya sa gobiyerno sanglit gikinahanglan man nga impartial kini sa tanang habig.

Si Cuenco midugang nga imbes nga sa naandang proseso nga impeachment sa mga opisyal sa Comelec mas madali kun himuon dayon ang revamp ug aron mabalik ang salig sa katawhan.

Asoy pa ni Cuenco nga duna gyuy kamatuoran nga dali rang matawgan ang opisyal sa Comelec apan wala niini klaruha kun siya ba ang mihimo sa pagtawag og opisyal. Matud pa niya dako kaayo ang posibilidad nga maapektuhan ang kamatinud-anon sa mga resulta sa eleksyon.

Si Cuenco maoy usa sa nangamahan karon sa House Bill 4528 nga ipasar karong sunod pag-abli sa sesyon sa Kongreso diin ang maong balaudnon magtukod og usa ka Truth Commission nga maoy mohimo og recount sa mga Election Returns niadtong 2004.

Buot nga sutaon sa maong tukurong grupo kun si kinsa gyud ang nakadaog niadtong piniliay sa duha sa ka mga dagkong posisyon sa nasud aron mahatagan og katin-awan ang mga naglibog nang katawhan gumikan sa nagpungasi nga pasangil sa oposisyon nga nanikas si Arroyo niadtong piniliay.