Mga South District kaps pro-GMA

Mga barangay kapitan sa South District sa dakbayan sa Sugbo milagda'g manifesto agig pagpakita og suporta kang Presidente Gloria Arroyo gumikan sa mga panawagan sa pagpakanaog niini sa mga sakop sa oposisyon ug sa mga kritiko niini tungod sa pasangil nga kini nanikas niadtong eleksyon.

Sa 34 ka mga barangay kapitan sa habagatang bahin sa dakbayan 32 kanila ang milagda sa manifesto nga ilang gipasar ngadto sa buhatan ni South District Representative Antonio Cuenco.

Ang maong mga kapitan mipalanog nga dako ang pasalig sa pamunuan sa pangulo ug nangangkong ang ilang mga konstituente naghatag og mandatus sa pangulo aron maoy mangulo sa nasud pinaagi sa paghatag og dakong botos niadtong piniliay.

Ang duha ka mga kapitan nga wala makalagda mao sila si Punta Prinsesa Barangay kapitan Jose "Joe" Navarro ug Labangon Barangay Kapitan Felix Abella kinsa pulos misuporta sa oposisyon niadtong milabay'ng piniliay.