Labing modernong parke sa Talisay

Mahinayon na ang pagtukod sa gikahinamang labing modernong parke nga sama sa atubangan sa White House sa Estados Unidos diha sa atubangan sa city hall sa Talisay City.

Kini human molampos ang kagamhanan sa Talisay sa pagpanag-iya sa 7,000 metro kuwadradong lote sa atubangan sa city hall building pinaagi sa mando sa korte.

Ang maong kamandoan nadawat sa kagamhanan sa Talisay niadtong Hunyo 24, 2005 gikan kang Regional Trial Court Judge Eric Menchavez sa branch 12 niini.

Ang pagluwat sa "writ of possession" pabor sa Talisay maghatag katungod sa kagamhanan niini nga makapanag-iya sa nahisgotang lote.

Misangpot ngadto sa korte ang maong kaso dihang mibalibad ang mga tag-iya sa maong mga yuta pagbaligya ngadto sa kagamhanan sa Talisay sa kantidad nga tag P2,200 matag metro kuwadrado.

Kini tungod kay ang gusto sa mga tag-iya mao ang P4,500 matag metro kuwadrado nga nakapapugos sa taga Talisay pagsang-at og expropriation proceedings niini ngadto sa korte.

Karong may desisyon na ang korte, mahinayon na ang dugay nang gikahinaman sa taga Talisay nga usa ka modernong parke diha sa atubangan sa city hall.