Gikulata sa selosong bana, gikuyapan

Gikuyapan ang usa ka asawa dihang gikulata siya sa iyang bana nga nagselos kaniya.

Naabtan sa kapolisan sa San Fernando si Shiela dela Victoria, 22, taga Sangat, San Fernando nga nawad-an og panimoot dihang nasabak sa mga kumo sa iyang bana nga si Rosilo Borbon, 30.

Si SPO2 Victor Bueno, desk officer sa San Fernando Police Station, nagkanayon nga naulian lang usab dayon ang biktima dihang gipamisil sa iyang mga silingan.

Gibutyag ni Bueno sa Banat News nga nadawat nila ang tawag sa telepono sa amahan sa biktima niadtong Biyernes alas 6:00 sa gabii.

Gumikan sa pagpangayog tabang sa amahan gisikop dayon sa kapolisan ang suspetsado kinsa ubos sa ilimnong makahubog.

Nasayran sa kapolisan nga gumikan sa kalasbag, nanghagit ang suspetsado og away sa iyang mga silingan.

Ang suspetsado nga usa ka mananagat, may gikalagotan diay kining silingan kay nagtuo siyang naibog sa iyang asawa.