Laing ex-convict gitipi sa vigilante

Napusgay ang ulo sa usa ka ex-convict dihang gipusil sa usa ka wala mailhing tawong gidudahang sakop sa vigilante diha sa usa ka panimalay sa Sitio Villagonzalo Dos, Barangay Tejero ning dakbayan kagahapon sa udto.

Usa ka bala sa kalibre 45 ang mitapos sa kinabuhi sa biktimang si Victor Del Mar, 61, anyos molupyo sa maong lugar ug kanhi bilanggo sa National Bilibid Prison sa Muntinlupa ug nakagawas niadtong tuig 1998 tungod sa kaso sa drogas.

Sa pakighinabi sa Banat News sa usa sa mga kaduwa sa "tong-its" sa biktima nga si Celedonio Manuel Condor, 72, kini mitug-an nga usa ka wala mailhing lalaki nga nagkawo ang kalit nga mipusil kang del Mar diha sa pultahan.

Matud pa ni PO3 Bobby Escarlan sa Homicide Section nianang tungura nagtalikod ang biktima sa pultahan samtang nagsugal sigun pa sa mga silingan ang maong lalaki taud-taod nang nagbarog-barog diha sa gawas sa balay ni Condor.

Si Linda Quijardo ang kapuyo sa biktima kinsa ex-convict usab sa Muntinlupa mitug-an sa Banat News nga walay kontra ang biktima ug wala na kini magnegosyo og drogas apan miangkong padayon gihapon kini sa paggamit og shabu.

Si del Mar maoy ika-68 nga biktima sa mga gidudahang vigilante nga aktibo sukad pa niadtong Disyembre 22 sa milabay'ng tuig.