Ipa-holiday ang Agosto 30

Giawhag sa mga sakop sa konseho sa dakbayan sa Mandaue si Presidente Gloria Macapagal Arroyo nga ideklarar ang Agosto 30 nga usa ka special non-working holiday sa tibuok dakbayan.

Ang mga sakop sa konseho mihimo sa maong awhag samtang sila nangandam na sa dakong kalihukan sunod buwan.

Ang dakbayan sa Mandaue magsaulog sa ika- 36 ka tuig nga anibersaryo human sa pagkahimo niini nga usa ka dakbayan.

Si Konsehal Wenceslao Gakit nga maoy nangamahan sa maong resolusyon miingon nga ang pagdeklarar sa maong adlaw nga walay trabaho dako gayud kaayo og tabang alang sa maong kalihukan.

Matud pa ni Gakit nga daghan nga kalihukan ang ila na nga gi-andam sa maong adlaw.

Si Mayor Thadeo Ouano sa dakbayan miingon nga karong tuiga ang Mandaue Chamber of Commerce and Industry kon MCCI nga gipangulohan ni Magpapatigayon Eric Mendoza maoy mangulo sa kalihukan.

Nagtuo si Mayor Ouano nga dako kaayo og matabang ang MCCI sa kalihukan karong sunod semana.

Nagkanayon si Ouano nga ang sektor sa mga magpapatigayon maoy dako og matabang.