Ate Glo anhi mag-relax sa sabado

Gipaabot nga subling mobisita sa Sugbo si Presidente Gloria Arroyo karong Sabado bisan pa sa nagpadayong mga lihok protesta pagpalagpot kaniya sa katungdanan didto sa kaulohan.

Kini human gikonpirmar ni Konsehal Sylvan Jakosalem ang pormal nilang pag-imbitar kang Arroyo nga motambong sa tinuig nga kapistahan sa Carmelite Monastery diha sa Mabolo karong bulana.

Gibutyag sa konsehal nga linudhan sa presidente nga sila si Secretary Serge Remonde nagkahinabi sa cellphone sa milabay'ng semana ug mao kini iyang giawhag aron maoy mo-imbitar sa presidente sa kapistahan sa Carmelite karong Sabado.

Gibutyag sa konsehal nga ilang gipahimuslan ang pag-imbitar sa presidente sa maong kapistahan aron subli kining makabisita ug maka-relax sa Sugbo taliwala ning kontrobersiya sa jueteng ug Gloriagate tape.

Masaligon ang konsehal nga mosanong ang presidente sa maong imbitasyon ilabi na kay pinangga kini sa mga Sugboanon.

Nasayran nga niadtong miaging tuig sa kapistahan sa Carmelite Monastery si presidente Arroyo maoy usa sa mga pinasidunggang dinapit.

Nunot niini misibaw usab ang dili pa konpirmadong report kagahapon nga anhi sa Malacañang sa Sugbo ipahigayon ang State of the Nation Address kon SONA sa presidente karong petsa 25 sa bulan sa Hulyo.

Samtang miluwat usab og manifesto kagahapong adlawa ang tanang mga konsehal sa dakbayan sa Sugbo apil na si acting Mayor Michael Rama nga nagpadayag sa walay paglubad nilang pagsuporta sa presidente.

Gani apil sa mipirma sa maong manifesto si Konsehal Joey Daluz, anak ni kanhi magbabalaod Inday Nita Cortes Daluz nga misuporta sa panawagan ni kanhi presidente Corazon Aquino pagpa-resign kang Arroyo.