Korean gipusil sa apapangig

Nawad-an sa panimuot ang usa ka negosyanteng Koreano human kini pusila sa apapangig atol sa pag-brownout diha sa tugkaran sa iyang gipanag-iyang restaurant sa barangay Ibo dakbayan sa Lapu-Lapu niadtong nakalabay'ng gabii.



Giila ang Koreano nga mao si Jao Ho Lee,38, ulitawo ug lumad nga taga South Korea ug nanag-iya sa Antons Restaurant sa naasoy'ng lugar kinsa gipusil sa wala pa mailhing mga tawo.

Samtang ang gwardiya niining si Benjie Lauron Monserate,30, lumad nga taga Sipalay City Negros Occidental, walay nahimo dihang gitiunan og armas de fuego dayong gibukbok sa armas ug gigapos sulod sa iyang guardpost.

Base sa gihimong imbestigasyon sa Homicide Section sa Lapu-Lapu Police tulo ka wala mailhing mga lalaki ang miduol diha sa gwardiya dayong tion og armas kaniya ug migaid sa baba ug mga bukton niini.

Usa sa mga gikatahapan gikatahong nagtinagalog nga mibahad kaniya . "Wag kang mag-alala guard, amo mo lang ang kailangan namin wag ka lang masyadong madaldal," maoy giingong bahad sa usa sa mga tulisan.

Dangtag pila ka gutlo kalit nga mipaka ang duha ka buto sa armas ug nasutang ang iyang agalong si Lee kinsa misusi unta sa gawas sa pag-brown out gisugat diay og pusil sa mga suspek.

Si Lee pagka-igo sa apapangig nga milapos sa walang abaga nawad-an sa panimuot ug nahagba, didto na sa Mactan Doctors Hospital nadangat.

Gisusi pa karon sa kapolisan ang motibo sa insidente sanglit walay natahong kabtangan ug salapi ang nawala gikan sa biktima. Uban sa report ni Romeo T. Limpangog